ნომერი ტექსტი
22 და აღუარებდეს იგინი საქმეთა მათთა დიდ-დიდთა და საკჳრველებათა მისთა, და ვითარ-იგი ეჩუენა მათ ანგელოზი ღმრთისაჲ.
1 და ტობი დაწერა ლოცვაჲ მათა მიმართ სიხარულად და თქუა: კურთხეულ არს ღმერთი, რომელი ცხოველ არს საუკუნეთა, და სუფევაჲ მისი ჰგიეს მარადის.
2 რამეთუ მან ტანჯის და შეიწყალის, შთაიყვანის ჯოჯოხეთად და აღმოიყვანის. და არავინ არს, რომელი განერეს ჴელსა მისსა.
3 აუარებდით მას ძენი ისრაელისანი წინაშე წარმართთა, რამეთუ მან მიმოგთესნა თქუენ მათ შორის.
4 და მუნ უჩუენეთ დიდებულებაჲ მისი, აღამაღლებდით მას წინაშე ყოვლისა ცხოველისა, რამეთუ იგი თავადი არს უფალი ჩუენი და ღმერთი, და იგი თავადი არს მამაჲ ჩუენი ყოველთა მიმართ საუკუნეთა.
5 მტანჯის ჩუენ ცოდვათა ჩუენთათჳს და კუალად შეგჳწყალნის და შეგუკრიბნის ჩუენ ყოველთაგან თესლთა, სადაცა განვიბნივნით მათ შორის.
6 უკუეთუ მოიქცეთ მისა ყოვლითა გულითა თქუენითა და ყოვლითა სულითა თქუენითა ყოფად წინაშე მისა ჭეშმარიტებისა, მაშინ მოიქცეს იგი თქუენდა და არა გარე-მიიქციოს პირი მისი თქუენგან. და იხილოთ, რაჲ-იგი ყოს თქუენ თანა. და აუარებდით მას ყოვლითა პირითა თქუენითა და აკურთხევდით უფალსა სიმართლისასა და აღამაღლებდით მეუფესა საუკუნეთასა. მე ქუეყანასა ამას ტყუეობისასა აღუვარებ მას და ვაჩუენო ძალი სიმდიდრისა მისისაჲ. ნათესავნი ცოდვილთანი მოიქეცით მისა ცოდვილთანო და ყავთ სიმართლე წინაშე მისა. ვინ უწყის, გინებოს ხოლო თქუენ და ყოს მოწყალებაჲ თქუენ თანა.
7 ღმერთსა ჩემსა აღვამაღლებ და სული ჩემი მეუფესა ცათასა უგალობდეთ დიდებულებასა მისსა.
8 იტყოდეთ ყოველნი და აუარებდით მას იერუსალემს.
10 აუარებდ უფალსა კეთილად და აკურთხევდ მეუფესა საუკუნეთასა, რაჲთა კუალად კარავი მისი აღეშენოს შენ შორის სიხარულით. და იხარე შენ შორის ტყუეთა და შეიყუარენ შენ შორის უბადრუკნი ყოველთა მიმართ ნათესავთა საუკუნეთა.
11 ნათესავნი მრავალნი მოვიდოდიან სახელისათჳს უფლისა ღმრთისა, ძღუენი ჴელითა მოაქუნდეს, ძღუენი მეუფისა ცათაჲსა, ნათესავმან ნათესავთამან მოსცეს სიხარული.
12 წყეულ არიან ყოველნი მოძულენი შენნი, კურთხეულ არიან ყოველნი მოყუარენი შენნი უკუნისამდე.
13 გიხაროდენ და მხიარულ იყავ ძეთა ზედა მართალთასა,
14 რამეთუ ნეტარ მოყუარენი მისნი და უხაროდენ მშჳდობასა შენსა ყოვლისა შემდგომად ტანჯვისა.
15 და იხარებდეს სული ჩემი უკუნისამდე, აკურთხევდეს ღმერთსა, მეუფესა ჩუენსა დიდსა.
16 რამეთუ აღაშენოს იერუსალემი საფირონითა და ზმარაგდონითა და ქვითა პატიოსნითა ზღუდენი მისნი და გოდოლნი და არდაბაგნი მისნი ოქროჲთა წმიდითა.
17 და უბანნი იერუსალემისნი ლიგჳრონითა და ანთრაკითა და ქვითა სოფერითგამოჲთა მოფენილ იყოს.
18 და იტყოდიან ყოველთა უბანთა მისთა: «ალელუა». აქებდენ და იტყოდიან: კურთხეულ არს უფალი, რომელი ნათელ არს ყოველთათჳს უკუნისამდე.
1 და დასცხრა აღსარებისაგან ტობი.
2 იყო ორმეოცდაათექუსმეტის, ოდეს წარწყმიდნა თუალნი და შემდგომად რვისა წლისა აღიხილნა. და იქმოდა ქველისსაქმესა და შესძინა შიში უფლისა ღმრთისა და აუარებდა მას.